咪囤積廁紙

2020年2月13日 年月日

【咪囤積廁紙】面對不確定的疫情,商舖超市嘅口罩、漂白水同食米,經常被人搶購一空,廁紙亦唔例外。唔少人一見舖頭入貨,即刻入番4、5、6條一打裝廁紙。不過大手入貨嘅朋友注意,雖然廁紙外嘅包裝,以及每卷紙,一般用塑膠袋包著,但如果包裝封口唔完整,或備有透氣孔,以至開封後,廁紙都容易吸濕受潮,甚至發霉,滋生微生物,影響衛生同品質。所以大家咪一次過買大量廁紙,如果買咗,亦要儲存喺乾爽、通風同潔淨嘅地方,唔適宜大量存放喺比較潮濕嘅洗手間,以防濕氣入侵,影響紙張品質。其實早前廁紙供應商表明,貨源充足,維持正常供應,大家毋須太擔心同一窩蜂搶購。

想知更多防疫資訊,即刻登入消委會《齊心抗疫》專頁