- 2018.02.14
拣抽湿机同玩剣击一样，最紧要一击即中。
想知边部抽湿机最抽得？即刻睇消委会嘅抽湿机效能大比拼！
测试嘅14款抽湿机，包括13款压缩式，当中1款係变频嘅压缩式抽湿机，另外仲有1款热石式抽湿机。
测试发现，压缩式抽湿机喺厂商惯用环境下嘅抽湿量，比起机电署嘅标準测试环境，平均高咗约6成半。
点解标準环境同厂商惯用环境，量到嘅抽湿量相差咁远？
关键係厂商惯用环境，无论设定嘅温度同相对湿度，都比机电署嘅标準测试环境高。
如果长时间喺温度同湿度相对较高嘅厂商环境下，抽湿量自然高D。
但开咗抽湿机一段时间，室内湿度理应下降，唔会长时间维持住偏高湿度，抽湿量自然减少。
所以当喺相对湿度同温度都无咁高嘅标準环境下，抽湿量自然少咗一截！
测试又发现，14款抽湿机样本中，11款喺厂商嘅测试环境下量得嘅抽湿量，比起标示嘅低。
当中4款嘅抽湿量，更少超过1成至3成几。
呢款样本，网页标示喺32℃同相对湿度80%下每日嘅抽湿量係16升，
但测试只量得10升左右，少左约3成半。
拣抽湿机除咗睇抽湿量，仲要睇埋产品嘅能源效率。
究竟係压缩式，抑或热石式抽湿机表现好D呢？
答案係压缩式抽湿机，无论喺厂商惯用环境、标準环境，
以至温度较低嘅低温环境，佢嘅能源效率都比热石式优胜；
但热石式喺3种测试环境下嘅抽湿表现都差唔多，无压缩式咁容易受温度同湿度影响。
提提大家，机电署规定，本港有售嘅压缩式抽湿机，都必须附有能源标籤，买机时，记得留意标籤上嘅数据。
今次12款能源效益级别标示为1级嘅样本中，
有1款根据测试结果计算，只达到2级，同标示嘅1级唔同，
但差异并无超出强制性能源效益标籤计划下的可接受公差範围（10%）。
另外，今次绝大部分样本都通过安全测试，
只有1款喺水箱移开后，手指有机会接触到内部电线嘅基本绝缘部分，有潜在风险。
想知点拣同点用抽湿机，睇吓消委会有咩好贴士：
- 记得参考能源标籤上嘅能源效率，数值愈高，愈悭电。
- 可以考虑设有时间掣嘅型号，既悭电又安全。
- 唔好将仲滴水嘅衫，放喺抽湿机上吹，以免发生危险。
- 仲要定期清洗水箱同隔尘网，避免滋生细菌，同积聚尘埃，影响散热。
想知更多抽湿机测试嘅结果，记得留意496期，选择月刊。