Skip to main content

抽濕機效能大比拼

  • 2018.02.14

揀抽濕機同玩剣擊一樣,最緊要一擊即中。

想知邊部抽濕機最抽得?即刻睇消委會嘅抽濕機效能大比拼!

測試嘅14款抽濕機,包括13款壓縮式,當中1款係變頻嘅壓縮式抽濕機,另外仲有1款熱石式抽濕機。

測試發現,壓縮式抽濕機喺廠商慣用環境下嘅抽濕量,比起機電署嘅標準測試環境,平均高咗約6成半。

點解標準環境同廠商慣用環境,量到嘅抽濕量相差咁遠?

關鍵係廠商慣用環境,無論設定嘅溫度同相對濕度,都比機電署嘅標準測試環境高。

如果長時間喺溫度同濕度相對較高嘅廠商環境下,抽濕量自然較高。

但開咗抽濕機一段時間,室內濕度理應下降,唔會長時間維持住偏高濕度,抽濕量自然減少。

所以當喺相對濕度同溫度都無咁高嘅標準環境下,抽濕量自然少咗一截!

測試又發現,14款抽濕機樣本中,11款喺廠商嘅測試環境下量得嘅抽濕量,比起標示嘅低。

當中4款嘅抽濕量,更少超過1成至3成幾。

有一款樣本,網頁標示喺32℃同相對濕度80%下每日嘅抽濕量係16升,

但測試只量得10升左右,少左約3成半。

揀抽濕機除咗睇抽濕量,仲要睇埋產品嘅能源效率。

究竟係壓縮式,抑或熱石式抽濕機表現較好呢?

答案係壓縮式抽濕機,無論喺廠商慣用環境、標準環境,

以至溫度較低嘅低溫環境,佢嘅能源效率都比熱石式優勝;

但熱石式喺3種測試環境下嘅抽濕表現都差唔多,無壓縮式咁容易受溫度同濕度影響。

提提大家,機電署規定,本港有售嘅壓縮式抽濕機,都必須附有能源標籤,買機時,記得留意標籤上嘅數據。

今次12款能源效益級別標示為1級嘅樣本中,

有1款根據測試結果計算,只達到2級,同標示嘅1級唔同,

但差異並無超出強制性能源效益標籤計劃下的可接受公差範圍。

另外,今次絕大部分樣本都通過安全測試,

只有1款喺水箱移開後,手指有機會接觸到內部電線嘅基本絕緣部分,有潛在風險。

想知點揀同點用抽濕機,睇吓消委會有咩好貼士

  • 記得參考能源標籤上嘅能源效率,數值愈高,愈慳電。
  • 可以考慮設有時間掣嘅型號,既慳電又安全。
  • 唔好將仲滴水嘅衫,放喺抽濕機上吹,以免發生危險。
  • 仲要定期清洗水箱同隔塵網,避免滋生細菌,同積聚塵埃,影響散熱。

想知更多抽濕機測試嘅結果,記得留意496期,選擇月刊