- 2017.08.15
天气热，头发容易笠黐黐，咪以为洗吓头就得。如果拣错洗头水，分分钟令你越洗、越头痕！想好似我咁，成日都咁清爽无头痕？一齐睇今期《选择》，教你点拣洗头水啦！
今次测试嘅60款洗头水，价钱由45至390蚊不等。测试结果发现，有37款获得满分5分，而最低分嘅5款就获得2.5分，当中包括售价最平同最贵两款。
测试发现超过6成检测样本，即38款洗头水检出二恶烷，大家买洗头水时要留心啲喇！其中7款二恶烷含量较高嘅样本，比欧盟消费者安全科学委员会SCCS建议嘅化妆品安全水平仲要高。二恶烷有机会系制造过程中产生，可能刺激双眼同呼吸道。但洗头水一般同皮肤接触时间比较短，而且二恶烷具挥发性。正常情况下，唔会对你嘅健康构成威胁。不过有得拣，最好当然系拣无二恶烷嘅产品啦！
另外，有12款样本验出可致敏防腐剂MIT或者CMIT。其中一款同时验出MIT同CMIT，高过内地同欧盟嘅规定。有3款MIT嘅浓度，高于SCCS建议嘅冲洗式产品安全水平，依类防腐剂较高, 部分人士可能出现皮肤痕痒等敏感反应。
另外，测试中部分样本声称有机、或成份天然的产品，亦发现致敏机会较高嘅防腐剂，买洗头水时，记得留意产品嘅标签成份。
测试又发现，一款洗头水验出游离甲醛，有机会导致部分人士皮肤痕痒或出红疹。
唔想连拣洗头水都咁头痕？睇下消委会俾你嘅贴士啦！
• 拣适合自己肤质、发质嘅洗发水
• 有湿疹或者皮肤敏感嘅人士，要避免可致敏嘅成分
• 留意生产同有效日期，同开封后嘅使用期限
• 用后有不良反应，睇清标签系咩致敏成份作怪，下次买避开佢地喇
想知多啲拣洗头水嘅资讯？就记得留意490期《选择》月刊喇！