- 2017.08.15
天氣熱，頭髮容易笠黐黐，咪以為洗吓頭就得。如果揀錯洗頭水，分分鐘令你越洗、越頭痕！想好似我咁，成日都咁清爽無頭痕？一齊睇今期《選擇》，教你點揀洗頭水啦！
今次測試嘅60款洗頭水，價錢由45至390蚊不等。測試結果發現，有37款獲得滿分5分，而最低分嘅5款就獲得2.5分，當中包括售價最平同最貴兩款。
測試發現超過6成檢測樣本，即38款洗頭水檢出二噁烷，大家買洗頭水時要留心啲喇！其中7款二噁烷含量較高嘅樣本，比歐盟消費者安全科學委員會SCCS建議嘅化妝品安全水平仲要高。二噁烷有機會係製造過程中產生，可能刺激雙眼同呼吸道。但洗頭水一般同皮膚接觸時間比較短，而且二噁烷具揮發性。正常情況下，唔會對你嘅健康構成威脅。不過有得揀，最好當然係揀無二噁烷嘅產品啦！
另外，有12款樣本驗出可致敏防腐劑MIT或者CMIT。其中一款同時驗出MIT同CMIT，高過內地同歐盟嘅規定。有3款MIT嘅濃度，高於SCCS建議嘅沖洗式產品安全水平，依類防腐劑較高, 部分人士可能出現皮膚痕癢等敏感反應。
另外，測試中部分樣本聲稱有機、或成份天然的產品，亦發現致敏機會較高嘅防腐劑，買洗頭水時，記得留意產品嘅標籤成份。
測試又發現，一款洗頭水驗出游離甲醛，有機會導致部分人士皮膚痕癢或出紅疹。
唔想連揀洗頭水都咁頭痕？睇下消委會俾你嘅貼士啦！
• 揀適合自己膚質、髮質嘅洗髮水
• 有濕疹或者皮膚敏感嘅人士，要避免可致敏嘅成分
• 留意生產同有效日期，同開封後嘅使用期限
• 用後有不良反應，睇清標籤係咩致敏成份作怪，下次買避開佢地喇
想知多啲揀洗頭水嘅資訊？就記得留意490期《選擇》月刊喇！