- 2017.03.15
屋企有长者细路，平日返工心挂挂，唔少家庭会装番个家居监控镜头，睇住佢哋先至安心。但呢D产品除咗价钱、功能差异大，使用时仲要留意私隐安全等问题！今期选择，就教下你，点拣部安全又好用的家居监控镜头。
今次消委会检视市面上达40款家居监控镜头，售价由200几至1,500蚊不等。其中唔少型号，可凭云端帐号或P2P（点对点）方式运作，由厂房的伺服器提供连接服务，镜头画面就可以串流至手机或电脑，设置非常容易。
拣监控镜头，首先要留意佢嘅镜头视角！
监控镜头一般采用广角镜，部分视角可达100度或以上，更有部分采用鱼眼镜的镜头，视角可达180度，但用鱼眼镜观看人物或物件，都会显得更加细小，而且变形较多，所以买嗰阵，一定要谂清楚用途先好买。
监控镜头一般都系长开，想记忆卡保存多日嘅录影，就要留意监控镜头支援嘅影片编码！
想要高清又悭位，可以选择支援H.264的款式，佢系一种高效能影片编码技术，纪录影片的数据量比传统格式大幅减少，却仍可以保存高质素影像。适合要长开监控镜头录影的用家。
如果想夜晚都可以记录清晰影像，可以选择带红外线照明的监控镜头！
红外线影像虽然无乜色彩，但影像清晰，足以清晰记录现场状况，适合在夜间或光线昏暗的地方使用。某些型号还具备红外线滤光功能，日常拍摄时阻挡红外线进入，令影像更自然真实。
网络安全系当今世代嘅重中之重，家具监控镜头，记录咗好多个人私隐，万一流出，后果可以好严重，点样保障你同家人嘅私隐？睇睇消委会比你嘅贴士啦！
- 记得设置较复杂的云端密码同镜头密码，仲要定期换密码。
- 记得检察及更新监控镜头嘅韧体（firmware），修补已发现的软件漏洞，降低被黑客入侵的机会
- 尽量只用私人设备登入镜头睇画面，以防帐号密码被窃取
- 唔单止你嘅私隐重要，屋企嘅家佣姐姐，以至上门嘅补习老师，或维修人员嘅私隐同样要尊重，如果部监控镜头会影到佢地，记得要预先通知，同咪乱咁公开片段
总之记住，有咗家居监控镜头，屋企一目了然，唔想私隐外泄，一定要做足网上安全措施！想知更多呢d相关资讯，记得留意485期《选择》月刊。