- 2017.03.15
屋企有長者細路，平日返工心掛掛，唔少家庭會裝番個家居監控鏡頭，睇住佢哋先至安心。但呢D產品除咗價錢、功能差異大，使用時仲要留意私隱安全等問題！今期選擇，就教下你，點揀部安全又好用的家居監控鏡頭。
今次消委會檢視市面上達40款家居監控鏡頭，售價由200幾至1,500蚊不等。其中唔少型號，可憑雲端帳號或P2P（點對點）方式運作，由廠房的伺服器提供連接服務，鏡頭畫面就可以串流至手機或電腦，設置非常容易。
揀監控鏡頭，首先要留意佢嘅鏡頭視角！
監控鏡頭一般採用廣角鏡，部分視角可達100度或以上，更有部分採用魚眼鏡的鏡頭，視角可達180度，但用魚眼鏡觀看人物或物件，都會顯得更加細小，而且變形較多，所以買嗰陣，一定要諗清楚用途先好買。
監控鏡頭一般都係長開，想記憶卡保存多日嘅錄影，就要留意監控鏡頭支援嘅影片編碼！
想要高清又慳位，可以選擇支援H.264的款式，佢係一種高效能影片編碼技術，紀錄影片的數據量比傳統格式大幅減少，卻仍可以保存高質素影像。適合要長開監控鏡頭錄影的用家。
如果想夜晚都可以記錄清晰影像，可以選擇帶紅外線照明的監控鏡頭！
紅外線影像雖然無乜色彩，但影像清晰，足以清晰記錄現場狀況，適合在夜間或光線昏暗的地方使用。某些型號還具備紅外線濾光功能，日常拍攝時阻擋紅外線進入，令影像更自然真實。
網絡安全係當今世代嘅重中之重，家具監控鏡頭，記錄咗好多個人私隱，萬一流出，後果可以好嚴重，點樣保障你同家人嘅私隱？睇睇消委會比你嘅貼士啦！
- 記得設置較複雜的雲端密碼同鏡頭密碼，仲要定期換密碼。
- 記得檢察及更新監控鏡頭嘅韌體（firmware），修補已發現的軟件漏洞，降低被黑客入侵的機會
- 儘量只用私人設備登入鏡頭睇畫面，以防帳號密碼被竊取
- 唔單止你嘅私隱重要，屋企嘅家傭姐姐，以至上門嘅補習老師，或維修人員嘅私隱同樣要尊重，如果部監控鏡頭會影到佢地，記得要預先通知，同咪亂咁公開片段
總之記住，有咗家居監控鏡頭，屋企一目了然，唔想私隱外洩，一定要做足網上安全措施！想知更多呢d相關資訊，記得留意485期《選擇》月刊。