- 2017.01.25
李小姐望著塊鏡，搽粉，自言自語:
唉，都係化濃少少粧，費事成日俾班同事笑我皮膚又黑，又多癦…
李小姐: (睇手機團購網站):
噫！團購價，$688做6次激光美容？好抵噃！咪執輸
(美容中心內)
第一擊：投其所好 專捉心理：
美容師: 李小姐，你做咗5次激光美容療程，D皮膚白淨咗、毛孔又細咗，真係明顯改善咗噃。
李小姐: 係咩？D同事都係咁講噃 (滿足地笑)
(美容顧問入房)
美容顧問: 李小姐，你今個月生日，公司有個特別優惠俾你，我地原價30萬嘅VIP會籍，宜家只需要10萬蚊，仲送2萬蚊超市禮劵，優惠做哂就無，咪執輸！
李小姐: 都係好貴啫
美容顧問: 咁嘞，見你咁好傾，你JOIN VIP會籍，我FREE咗你$688個激光療程
美容師: 哇，真係抵到爛，我係你就咪執輸啦。
專家拆解: 認清心理死穴 越驚執輸越易輸
專家教路 見招拆招: 限時優惠需冷靜 停停諗諗至決定
李小姐:
FREE我 $688個療程，但又要大嗱嗱俾10萬蚊個會籍，真係抵到爛咩？咪玩啦！我返去諗諗先，下次再答你。
第二擊：一味靠嚇 輪流圍政
美容師: 李小姐，俾10萬蚊就做到VIP，以後都可以用我地最尊貴嘅私人浴室VIP房，真係機會難得嫁。我真係唔知同唔同你講好，每次幫你做MASSAGE時留意到你D淋巴好脹同有硬塊。
美容顧問: 咁你就要小心啦李小姐，淋巴閉塞分分鐘變成腫瘤，有機會生CANCER。
李小姐: 吓，無咁誇張掛？
美容師: 吓，我有個客，同佢講咗呢D位淋巴有硬塊佢又無理，結果咪…
美容顧問: 你又唔使咁擔心，你買咗我地VIP會籍，隨時BOOK時間推淋巴咪無事囉。
李小姐: 我都係想諗下先。呀，夠鐘啦，麻煩你遞件衫俾我，我想換衫走先。
美容顧問: 你唔使咁心急，放心啦，我地唔會迫你買….
專家拆解: 意志堅定 拒絕硬銷
美容顧問: 李小姐，你個CASE真係好嚴重，我請埋分店經理同你講..
分店經理: 李小姐，老實講，你除咗淋巴有事之外，成身黑痣隨時會變成皮膚癌，如果唔用我地的激光療程除咗D痣，分分鐘連皮膚癌都生埋。
美容顧問: 係呀，呢D CASE我見唔少，遲D真係無得搞。我地個激光至尊美容療程12萬啫，你當醫療保健都有著數啦！
第三擊: 貶低形象 疲勞轟炸
李小姐: 你地俾返件衫我，我要走啦
美容顧問: 仲有呀，你睇你成身皮膚乾到似沙紙！唔做JOIN VIP療程，無得搞！
美容師: 到時又俾你班同事笑你似村姑…
分店經理: 咪係囉，俾多少少錢都唔捨得。
美容師: 不如咁啦，你揀個平D，10萬蚊嘅VIP會籍先，番屋企諗諗係咪買激光療程啦！
李小姐: 俾我著返件衫先得唔得?
美容師+美容顧問+分店經理: 簽咗先！
專家拆解: 怕心軟軟弱 做足預防措施 (例如考慮唔帶卡、同朋友一齊去)
專家教路、見招拆招: 擺明立場 態度鮮明
李小姐: 我已經講得好清楚，我宜家唔會買任何PLAN。你地想禁錮我呀？再唔俾我走我即刻報警！
李小姐:
由頭到尾我都喺張床度，又話我會生癌，彈我呢樣果樣，又唔俾番件衫我著，我又驚又累，又唔走得，我真係頂唔住，最後買咗個10萬蚊嘅VIP會籍至走到，但原來個會籍只得半年有效期。
仲有，講好話有2萬蚊超市禮券，佢地一時話要到總店攞，一時又話無貨，隔咗成個幾月，到宜家連影都無！
分店經理: 我地有迫佢咩？(問旁邊兩人)
美容顧問: 吓，我地係用專業嘅美容意見同佢分析件事，只係肉緊D啫！
美容師: 個會籍寫明係半年，佢趕住走無睇清楚啫！
專家拆解總結二: 意志堅定 不為所動