- 2017.03.15
大火炒，細火煎，想煮野得心應手，緊要有個好幫手。今次消委會測試咗18款雙頭氣體煮食爐，售價由1,500蚊至6000幾蚊不等。以5分為滿分，驟眼睇18個樣本中，有15個總評攞到4分或以上。咁究竟點揀雙頭爐？等《選擇》話你知啦！
買爐具，最緊要安全。測試發現，3款樣本按測試結果計算出的廢氣中一氧化碳濃度超出機電工程署規定的上限(0.14%)，最高一款超出上限約1.6倍。
機電署表示用戶在使用煮食爐時，應確保廚房的空氣流通，機電署指，3款產品在正常情況下使用是安全的。其實所有氣體煮食爐，在使用過程中都會釋出不同濃度的一氧化碳，大家煮食時，記得保持室內空氣流通。
中國人煮食講求「鑊氣」，咁就要睇個爐嘅熱輸入量，嚟衡量佢嘅「火力」夠唔夠勁。大部分測試樣本量度到的熱輸入量，都低於聲稱嘅數值。其中呢3款石油氣爐，佢嘅火力比聲稱數值低近一成。8.5% (#15), 9.7%(#16), 8.7%(#18)
買爐具，加熱效率都好重要！例如喺同樣環境下燒一煲水，加熱效率高的爐頭，燃料用量相對較少。今次18款樣本表現都好參差。
9款煤氣爐加熱效率最多相差達到22%，即加熱效率最高嘅爐頭，會比最低嘅慳兩成二燃料。
石油氣爐方面，最高和最低加熱效率的爐頭，燃料用量亦相差近兩成。(18%)
煮餸唔係一味靠大火，大細火夠分明，就要留意熱輸入量嘅可調校範圍，調校彈性最大的一款，同一爐頭最高和最低的熱輸入量差距，達到93%，無論大火煎或細火炆都無難度。
根據《氣體安全條例》，本港出售的氣體煮食爐，必須有機電署發出的「GU」標誌，而使用之前必須經註冊技工進行安裝或測試。仲有……
- 避免在煮食爐附近放置易燃物品
- 若打唔著火，切勿急於連續再打，因為每次打火都會釋出燃氣，有機會發生搶火甚至爆炸
- 記得經常清潔爐頭及爐架，以保持爐頭氣孔暢通。
- 最少每18個月，就要聯絡註冊氣體工程承辦商做安全檢查。
想知更多雙頭氣體煮食爐的資訊，記得留意485期《選擇》月刊