- 2018.03.15
我平时喺屋企都会洗吓碗碟，做吓家务。
讲到洗碗碟，一支好嘅洗洁精好重要！点至算好？
即刻睇吓消委会嘅洗洁精测试大比拼，就知边款最洗得﹗
今次测试嘅35款洗洁精，有一般配方，浓缩配方，同超浓缩配方三类。
测试将4毫升洗洁精混入清水，睇吓佢地可以洗干净几多隻有污渍嘅碟。
拣洗洁精，梗要睇边款洗得多！今次洗大饼嘅测试，结果都几悬殊。
呢款平均洗到6.8隻污糟碟，而呢款最多，平均洗到38.6隻碟！
点解结果差咁远﹖
一般嚟讲，洗洁精嘅表面活性剂浓度越高，洗涤效能一般会较理想。
含有阴离子表面活性剂，例如LAS、SLES同SLS嘅洗洁精，起泡同去油效果不错，洗碗碟量都可能因此较多。
不过如果用咗含量高嘅SLS或SLES嘅洗洁精之后无用清水洗干净双手，
表面活性剂会残留喺皮肤表面，可能会刺激皮肤，或者造成绷紧、干燥嘅感觉。
有时同一个品牌，除咗一般配方之外，仲有超浓缩或浓缩配方。
究竟佢哋係咪比一般配方洗得更多？
测试检视咗4个品牌，发现佢哋嘅超浓缩或浓缩配方，比一般配方洗多7至19隻碟。
洗洁精唔单止要洗得，价钱都好重要。
究竟价钱平嘅样本，佢地嘅洗碗碟效能，会唔会差啲呢？
以每10毫升零售价计算，呢8款价钱最平样本，平均只洗到大约12隻碟，当中只有1款无检出可致敏防腐剂。
平均零售价高少少嘅呢13隻样本，平均洗到17.2隻碟，当中一半有可致敏防腐剂。
平均零售价再高啲嘅呢12款样本，平均洗到近24隻碟，但仍有半数有可致敏防腐剂。
今次消委会嘅测试发现，6成样本，即係21款含有可致敏防腐剂BIT、MIT，同CMIT。
究竟佢地对人体有咩影响呢？
消费者如果经常重覆接触MIT、CMIT同BIT含量较高嘅洗洁用品，有机会令双手出现皮肤炎。
市面上一啲洗洁精产品声称可以用嚟洗蔬果，究竟有无问题呢？
今次测试检视咗6款洗洁精，声称可以同时用嚟洗蔬果，但其中5款都验出MIT、CMIT或者BIT，
加上佢地都无列明相关成份，建议消费者最好避免用洗涤剂嚟清洗蔬果，尤其是已切开的水果。
睇完测试结果，睇吓消委会有咩贴士俾大家：
- 就算洗洁精标明「唔伤手」、「成分天然」，甚至话有「护肤」同「滋润双手」嘅功效，都唔代表产品完全无致敏物质，记得睇清楚成分列表先好买吖。
- 洗碗碟时，如果污渍唔算顽固，可以用冻水加适量洗洁精浸洗，唔驶长开水喉冲洗。
- 遇到顽固或者油腻嘅污渍，可以先用热水浸泡，再用洗洁精清洗，可以节省洗洁精嘅用量。
想知更多拣洗洁精嘅小贴士，记得留意497期，《选择》月刊。