- 2017.05.15
炎炎夏日，有咩嘆得過係屋企涼冷氣？今期《選擇》測試咗14款兩匹的
分體式變頻冷暖空調機。一齊睇睇！
今次14款樣本，售價由六千幾到萬五蚊不等。所有樣本都通過基本嘅安全檢測，整體表現仲唔錯添！除咗2款總評拿到4.5分，剩餘各有6部，總評分別攞到4分同3.5分。
買冷氣機，唔係夠COOL就得。識得揀，梗係揀部能源效率高嘅㗎啦！
雖然今次全部樣本，都攞到1級能源標籤，但佢地嘅製冷效率同慳電程度，可以好唔同。
能效比，簡稱EER，係指喺特定溫度同濕度下，部冷氣機嘅製冷量與耗電量的比率。數值越高，代表部冷氣機製冷效率越高。
記住，要根據空間嘅大細，嚟揀部適合的冷氣機。例如你個廳明明比較大，但就買部製冷量唔夠嘅變頻式冷氣機，以為可以慳電，其實仲曬電！
例如你想將室內嘅溫度校到25度，但係部變頻式冷氣機製冷量又唔夠，佢就會長期「開到行」，即係達到佢嘅最大負荷，先達到預設嘅溫度，咁佢嘅製冷效率，即係能效比，會比較低。
相反，一部製冷量同空間配合的變頻式冷氣，就只係初初開機時先會最大負荷，過後長時間用低啲嘅轉速運行，已經夠維持預設溫度，而低啲嘅轉速嘅能效比會高好多，半負荷時嘅能效比，更加會提升3成至7成半不等！
所以大家要因應空間大細，揀部製冷量合適嘅變頻冷氣，吾駛成日要佢去到最大負荷，咁就自然慳電又環保啦
除咗能效比，製冷季節性表現系數可以更準確反映部冷氣機嘅能源效率。
製冷季節性表現系數，代表冷氣機全年由室內排走的總熱量，同總耗電量的比率。測試發現，系數最高同最低的兩款冷氣，數值相差達到兩成，即係耗電量亦相差兩成！
唔少冷氣機都有抽濕功能，用冷氣機嚟抽濕，表現又得唔得呢？
測試發現，各樣本在標準環境下的抽濕表現參差。表現最好嘅一款有四點評分，最差嘅只有兩點評分。其實冷氣機耗電量一般比較高，如果唔使調節室內溫度，用抽濕機抽濕，會更加划算！
消委會提提你，部冷氣機嘅性能固然重要，但安裝同保養都唔可以忽略！
- 冷氣機裝得好唔好，會直接影響製冷性能。一定要搵合資格、經驗豐富、負責任及信譽可靠的承辦商嚟安裝，由製造商或代理商負責安裝更加好，一旦安裝有問題，可以直接搵佢地跟進。
- 通常製造商或代理商嘅保用都只保證機件運作正常，唔負責因安裝產生嘅問題，例如雪種喉管接駁唔好，出現嘅滲漏問題。所以過後發覺係安裝做得唔好，就要搵番當初負責安裝嘅承辦商跟進啦！
總之，想揀夠COOL，製冷效能又好嘅分體式冷氣機可以點？
睇487期《選擇》月刊啦！