- 2016.08.19
我最鍾意同BB一齊行街街，去公園曬太陽，一架安全又輕便嘅BB車當然唔少得。最新一期《選擇》月刊，測試咗21款嬰孩手推車，睇睇有吔發現先。
在21款測試嘅BB車中，有1款車架上細小縫隙，有機會夾親BB嘅手指或腳趾。測試又發現，1款樣本座椅的扶手位置，有尖而粗糙嘅邊緣，有機會割傷BB。
用作固定BB在座椅上嘅安全帶都好緊要，測試發現其中1款唔符合歐洲標準要求，BB在車上擰嚟擰去時，有機會扯開安全帶。
除了安全帶，BB車的「車碌」鎖設計，都好重要。
測試發現，2款用作固定BB車嘅「車碌」鎖，在獨立上鎖設計，不符合歐洲標準要求，「後碌」鎖必須係同時上鎖嘅設計。
提提大家，咪以為推BB車是小兒科，記著呢6大秘訣啦！
扣好安全帶
1. BB無時停，放佢落BB車時，記得幫佢扣好安全帶。仲有，安全帶扣得太緊，BB固然會唔舒服，太鬆又會失去保護作用。
小心向後翻
2. 不要將購物袋或重物掛在BB車上，避免佢失重心向後翻倒。推車仔上斜路時，重心會向後移，小心翻車。
咪用扶車梯
3. 不要在樓梯或自動扶手梯用BB車，萬一失去重心或突然下滑，不止整傷BB，仲會引起骨牌效應，傷及其他人。為安全著想，應使用升降機。
手把咪亂轉
4. 當有BB在車內，不要轉換推手手把方向，有機會夾傷BB的手指或手臂。
咪當BB車係玩具
5. 不要讓小朋友將BB車當玩具玩，如果有BB在車上，更加不要讓小朋友推BB車，他們未有足夠能力確保BB車子的安全。
小心網購同二手BB車
6. 網購BB車，可能慳錢又方便，但未必符合相關安全標準。如果買二手BB車，記得檢查清楚，結構是否安全及零件是否齊全。
記著，BB安全喺你手，推BB車千奇咪大意，想知多D小貼士，記得留意478期嘅《選擇》月刊啦！