- 2017.11.02
佢哋，無處不在。你去到邊，都跟住你。慢慢，你開始控制唔到自己，跌落不能自救嘅深淵......網購嘅誘惑就係咁大。
網購越嚟越貼身。要買嘢越嚟越方便，行街、上網，喺電腦、手機click一click，24小時都有嘢買。購物變得方便，令人容易消費成癮，喪買，之後爭落一大堆卡數，到還款日，急住要錢上嚟就容易跌入借錢陷阱。
以為自己唔會中計？ 其實你嘅消費模式同使錢原則， 好有可能已經被狡猾嘅借錢廣告慢慢改變。
借錢廣告就好似魔鬼，用「方便，慳好多息」做招徠，刻意隱藏背後嘅條款同恐怖後果。而且呢啲廣告無處不在，周圍試探誘惑喜愛消費嘅年輕人，稍一不慎就會動搖，跌落借錢深淵。以為賣得廣告，呢啲財務公司實信得過、以為低息就係慳息，其實最後咪又係要你越借越多，還款期越拖越長！搞到一畢業出嚟賺錢就揹住筆債，還到結婚生仔都未必還完。
過度消費除咗衍生債務負擔，仲可能導致精神或者情緒困擾，嚴重嘅甚至令你同家人朋友關係破裂。
所以話：先使未來錢，越借越可憐！後果咁恐怖，你仲唔快啲時刻提醒自己節制嘅重要？
「理性消費 x 負責任貸款」特集更多文章：