朱晨麗 X 洗潔精洗滌防敏測試

2018年3月15日 年月日
轉發
電郵此頁面

我平時喺屋企都會洗吓碗碟,做吓家務。

講到洗碗碟,一支好嘅洗潔精好重要!點至算好?

即刻睇吓消委會嘅洗潔精測試大比拼,就知邊款最洗得﹗

今次測試嘅35款洗潔精,有一般配方,濃縮配方,同超濃縮配方三類。

測試將4毫升洗潔精混入清水,睇吓佢地可以洗乾淨幾多隻有污漬嘅碟。

揀洗潔精,梗要睇邊款洗得多!今次洗大餅嘅測試,結果都幾懸殊。

呢款平均洗到6.8隻污糟碟,而呢款最多,平均洗到38.6隻碟!

點解結果差咁遠﹖

一般嚟講,洗潔精嘅表面活性劑濃度越高,洗滌效能一般會較理想。

含有陰離子表面活性劑,例如LAS、SLES同SLS嘅洗潔精,起泡同去油效果不錯,洗碗碟量都可能因此較多。

不過如果用咗含量高嘅SLS或SLES嘅洗潔精之後無用清水洗乾淨雙手,

表面活性劑會殘留喺皮膚表面,可能會刺激皮膚,或者造成繃緊、乾燥嘅感覺。

有時同一個品牌,除咗一般配方之外,仲有超濃縮或濃縮配方。

究竟佢哋係咪比一般配方洗得更多?

測試檢視咗4個品牌,發現佢哋嘅超濃縮或濃縮配方,比一般配方洗多7至19隻碟。

洗潔精唔單止要洗得,價錢都好重要。

究竟價錢平嘅樣本,佢地嘅洗碗碟效能,會唔會差啲呢?

以每10毫升零售價計算,呢8款價錢最平樣本,平均只洗到大約12隻碟,當中只有1款無檢出可致敏防腐劑。

平均零售價高少少嘅呢13隻樣本,平均洗到17.2隻碟,當中一半有可致敏防腐劑。

平均零售價再高啲嘅呢12款樣本,平均洗到近24隻碟,但仍有半數有可致敏防腐劑。

今次消委會嘅測試發現,6成樣本,即係21款含有可致敏防腐劑BIT、MIT,同CMIT。

究竟佢地對人體有咩影響呢?

消費者如果經常重覆接觸MIT、CMIT同BIT含量較高嘅洗潔用品,有機會令雙手出現皮膚炎。

市面上一啲洗潔精產品聲稱可以用嚟洗蔬果,究竟有無問題呢?

今次測試檢視咗6款洗潔精,聲稱可以同時用嚟洗蔬果,但其中5款都驗出MIT、CMIT或者BIT,

加上佢地都無列明相關成份,建議消費者最好避免用洗滌劑嚟清洗蔬果,尤其是已切開的水果。

睇完測試結果,睇吓消委會有咩貼士俾大家:

  • 就算洗潔精標明「唔傷手」、「成分天然」,甚至話有「護膚」同「滋潤雙手」嘅功效,都唔代表產品完全無致敏物質,記得睇清楚成分列表先好買吖。
  • 洗碗碟時,如果污漬唔算頑固,可以用凍水加適量洗潔精浸洗,唔駛長開水喉沖洗。
  • 遇到頑固或者油膩嘅污漬,可以先用熱水浸泡,再用洗潔精清洗,可以節省洗潔精嘅用量。

想知更多揀洗潔精嘅小貼士,記得留意497期,《選擇》月刊。

投票
以下哪種洗潔精可能含有可致敏成分?