Skip to main content

網上維修咪大意

  • 2017.02.15

消費者委員會在去年收到超過2,300宗涉及維修及保養的投訴,數字升咗15%,網上提供呢類服務嘅公司真係花多眼亂,D公司網頁仲承諾多多……

我地「不成功不收費」!
唔使驚,維修後有保養期,執到掂為止!

但實情係點,睇吓消委會收到嘅呢3個真實個案啦!

個案一:違反服務承諾  拖延跟進
許生:  個廁所又塞咗,點算?! 上網搵幫手先。

通渠佬: 搵我幫手啦,唔掂唔收錢!

通渠佬大力敲門 
許生開門
通渠佬凶神惡煞:係咪姓許?
許生定睛一望:係
通渠佬:咁啱啦 
通渠佬開門,推開許生,自行走入屋內。
許生不知所措

通渠佬捏鼻檢查馬桶                                                                                                                                                                                                                                                                                                                                                                                                                                                                                             
許生慌慌張張:點呀?
通渠佬:喂大佬你呢個唔掂喔,要用出動高壓水槍喔
許生:高壓水槍?
通渠佬:無錯,3000蚊,一開包你水到渠成,仲使諗?
許生:哦咁…好啦

通渠佬:搞掂!有乜問題,一禮拜內出聲,係咁
許生:哦好,唔該…(關門聲)…曬…

一日,許生想去廁所,發覺又塞,即刻致電A公司

許生:你好,我前幾日先通完渠,而家又塞咗啦!
通渠佬chok聲:唔好意思啊許生,我地暫時聯絡唔到負責你果區嘅師傅啊,你過幾日再打黎啦。
許生:吓,咩話?喂?

幾日後… 

許生:你地咁樣拖法係想點啊?
通渠公司:許生,過咗成個禮拜先打嚟,再通要收錢㗎!
許生:吓?上次通完無幾日我就打過比你,咁都叫超過一禮拜?
通渠公司:係啊,下次請早。
許生無奈,生氣

許生:個網頁度明明講唔成功唔收錢,仲要拖到過咗保養期先覆我。唔得,搵消委會幫手

通渠佬:無得傾,渠已通,同埋講明一次性工程,唔會有保養。

個案二:單據地址不符  無如實更換零件
跟住嘅個案,方小姐屋企部冷氣機漏水,上網搵咗B公司維修,以為價錢標價幾合理,點知到俾錢先知中計!

修理工敲門
方小姐開門
修理工(假惺惺笑容):你好啊方小姐,我嚟整冷氣機㗎。
方小姐:哦,你好,入嚟啦
修理完畢
修理工:咁應該無問題啦,總共就750蚊。
方小姐:ok,唔該曬(遞錢)
修理工:多謝曬~bye~(假惺惺笑容)

(二個月後)

方小姐很熱,開冷氣
舉手試探,發覺無冷氣,拿起手機,預約:喂?我想預約冷氣維修,之前整過,又壞咗啦!
B公司:無問題!我地即刻約師傅! 

街邊,手機msg鈴聲
傭人voice msg:師傅上門整好咗啦,補咗雪種同換電容,總共$1,050。
方小姐望住手機
內心:換電容?

方小姐翻到屋企,發覺部冷氣機根本未整好,同埋又漏水,佢再搵其他師傅嚟整,發覺原來根本無換過電容,於是再搵B公司追討,點知…

方小姐:唔單止無同我換電容,跟住單據上的地址根本揾唔到間舖。好彩我經消委會揾到間公司。

咁人工同及物料都要錢嫁,算嘞,退返500蚊當無數嘞!

不過,B公司最後都無確認退款安排。

個案三:報價與收費不一  更換零件各執一辭
第三單個案,林小姐電腦壞咗,搵人上門維修,點知錢收咗,承諾嘅服務卻一樣都無做到,俾嘅錢都貴過報價,究竟咩一回事?

敲門
林小姐開門
維修員:hello,整電腦架
林小姐:你好啊,請入黎啊

兩人望住電腦
維修員㩒兩下電腦
電腦黑屏幕,沒反應
維修員:經我初步及詳細嘅檢查,你部機相信係主板損壞,需要帶翻公司做詳細檢查。
維修員合上電腦,林小姐疑惑眼神。
維修員:咁,檢查費就280蚊,遲d有消息我哋再打比妳啦。
林小姐:咁,好啦
維修員拿起電腦,起身離開

電話響
林小姐接電話:喂?
維修員:喂,妳好啊,我係電腦維修公司架,經過我地進一步詳細嘅檢查,妳部機個主板真係壞咗啦!咁呢,妳可以換主板,就1200蚊。但我地就強烈建議妳換部新機,就3200蚊。
林小姐:哇,咁貴架,我唔整啦,你地還部機我啦!
維修員:妳唔好咁急先,妳諗下,妳電腦裡面實有很多資料未backup啦,唔整點得啊?一係咁,比個折妳,800蚊換新主板,輕輕鬆鬆兩年壽命,我包保你出面無咁低價,點睇先?
林小姐:um…咁,好啦
維修員:ok,就咁話!

幾日後
維修員:部腦整好咗,無問題就簽埋張單
維修員遞上電腦
林小姐接過電腦,一番檢查:ok啊
維修員:咁就麻煩比埋錢啦,總數$1080
林小姐:吓?之前傾好咗話800喔,又加價?
維修員:哦,仲有280係人工費。唉就當體諒下我哋呢d打工仔啦。
林小姐:唉好啦好啦。

過咗幾個月…
林小姐:部電腦又壞!

林小姐:我打開機身,先現覺原來之前根本無換過主板!

維修員:我地無承諾過幫林小姐更新主板,單據已經列明淨係修理損壞部分,同埋已經過左7日保養期,無理由再幫佢整

唔想成為下一個受害者,睇睇消委會俾你嘅貼士啦!

經網上搜尋揾維修,記得先核實商戶嘅地址同聯絡方法等;

睇清楚涉及維修服務、收費同保養服務等條款細則;

記得要求攞出正式單據

問清楚有無保養期,同有問題時跟進方式,記得要商戶清楚列喺單據上,以有事時免口同鼻拗。
想知道更多關於呢類投訴的詳情,記得留意484期《選擇》月刊