Skip to main content

森美 X 跑步緊身褲測試

  • 2017.01.16

有人話,跑步係一項好孤獨的運動,我就話,跑步係一項好自由的運動。只要一對跑鞋,一條舒服嘅跑步緊身褲,就可以陪我穿梭城市的大街小巷,享受跑步嘅樂趣!

點先算一條好嘅跑步緊身褲?《選擇》月刊測試咗市面上15款緊身褲樣本。測試嘅第一關,緊係要磨得!

消委會結果發現,15款樣本嘅耐磨性能都好高,經過20,000次耐磨測試都無被磨損;另外只有2款樣本喺起毛球測試後,出現些少毛球。

緊身褲除咗要磨得,仲要吸得快、乾得快,盡快將汗水帶走!

跑步容易出汗,緊身褲嘅吸濕表現亦好重要。布料吸濕越快,汗水就越快被帶走,令跑手皮膚保持乾爽。15款樣本中,有9款喺3秒內就能吸收0.05毫升嘅水;5款需要6至15秒,仲有1款樣本要大約3分鐘。

喺水份蒸發速度測試方面,15款樣本由濕透至乾透,需時102分鐘至520分鐘不等。

除咗要吸濕快,緊身褲仲要透氣唔焗身!

跑步加速人體新陳代謝,令身體產生濕氣。如果緊身褲透水氣度唔好,就會感到焗熱,影響舒適感。今次測試除2款樣本透氣度較遜色外,大部分都好好。

另外今次測試有兩個樣本嘅束腰喺汗水浸蝕下會甩色。
提提大家一d護理緊身褲嘅小貼士

- 檢視成分標籤:人造纖維如聚酯纖維、尼龍等物料,排汗快乾性可能較佳。

- 全棉或棉纖維比例超過50%,排汗快乾性能或較遜色。

- 如後腰、後膝、小腿位等使用網布設計,有助散熱。

想享受跑步嘅樂趣?仲等咩呀,即刻睇第483期《選擇》月刊,揀返條舒服嘅跑步緊身褲,一齊出嚟跑啦!